Uviéu aprueba un presupuestu "hestóricu", con 71 millones n'inversión

Unes cuentes enfocaes a la recuperación económica, tres les remortines de la pandemia

El Conceyu d'Uviéu aprobó de forma definitiva pa 2023 el mayor presupuestu de la so hestoria, 291,9 millones d'euros, y con una inversión de 71,2 millones. El conceyal de Promoción Económica y Tresformamientu Dixital, Javier Cuesta, calificólu de "hestóricu" y enfocáu a la recuperación económica y cola sensibilidá necesaria "p'atender" a la población tres les remortines derivaes pola pandemia.

El postrer presupuestu del mandatu del alcalde Alfredo Canteli pa 2023, añu electoral, cuntó col votu a favor de los 14 conceyales del equipu de gobiernu -PP y Ciudadanos- y el refugu de los grupos de la oposición -PSOE, Somos y Vox-, pa unes cuentes que destinen 12,4 millones pa la Fundación Municipal de Cultura.

Con un presupuestu consolidáu de 280 millones, la procedencia de los 71,2 millones d'inversiones del equipu de gobiernu vien de forma directa de fondos propios (59,7 millones), mientres que los 11,5 restantes van financiase con un préstamu.

El principal sofitu a les inversiones d'esti presupuestu, que per primer vegada nel mandatu de Canteli aprobóse primero que remate l'añu, son los fondos Edusi que van financiar parte de les obres de la entrada a Uviéu pela "Y", ente les que destaquen los 18 millones que va costar la modernización del Palaciu los Deportes.